UR NEẒṚI!!

Ur neẓṛi wukud ara neddu
yal wa iheddeṛ seṭṭac

taggara-ya ɛeṛqent-aɣ d ayen
iserreḥ ddɣel d akwessar
neqqim kan deg yiwen umekkan
nessmuqul ɣer tama yessefṛaḥen

leqbayel ssɛan yiwet n tikli telha
Ttnaɣen ɣef nnif d trugza
Tamaziɣt taɣelnawt tunṣibt
Attan tbedd tḥeṛṛit
Rran-as-d iman ineṣliyen
Seg Bulifa ɣer Bennay
ad aɣ-ssurfen widak ur d-nenni
Deg ul ẓẓan am ibawen
Tettkemmil armi d meɣres 80
Lmulud Mεammeri d wegdud aqbayli
Tamaziɣt d amezruy d abrid n tmussni
D aɣerbaz a yelli a mmi
Ur yelli kan d tmesxiṛ

AZUL SEG UL

Wwiɣ abrid la tedduɣ
ttnadiɣ ad awḍeɣ asirem-iw
Γur-i ciṭṭuḥ n tmussni
Ssuffɣeɣtt-id amzun d taḥuskit
Nessarem ad tili deg umezruy
am Mɛemmri d Kateb Yasin
walaɣ ifer n tmeɣrust yerɣan di lexṛif
Yeɣli-d inehher-it waḍu
Bujambeṛ yusa-d s igwefran
Yennayer s wedfel imelles-itt
Tafuk tessaɣ swaḥel d idurar
Azul ɣef umezruy n Cacneq
Azul ɣef imeɣnasen n tmaziɣt
Azul ɣef warem yebrir tmanyin
Azul ɣef imaziɣen n tmazɣa
Tamaziɣt tella iḍelli, am ass-a am zekka!

   YENNAYER

Ansuf s yennayer usɛid
awatay n wemɣid
deg wsegwas d ass amenzu
Yuli-d am waggur n lɛid
yeḍwa tudrin d temdinin
yal aɣmis fell-as iḥekku

Yebda-d di 950 send mass ɛissa
di trennawt n tegrawla
azemz n Ucacneq Amaziɣ

Tameɣra-s tewwi-d iẓid
seksu d uyaziḍ
lwaɛda yega Ucacneq
Tagi d taɣerma n ugellid
isem-is yettali yettzid
amezruy mad a t-yettu
Agdud amaziɣ irfed-it
ɣer igenni yessuli-it
yal uḥdiq yewwi-d asefru

Ayen yellan kan

Ayagi giɣ-t d ttallelt d wazal i tutlayt-iw d tmagit-iw. Mazal u mazal aqlaɣ nettkemmil

Zik asmi tella ddunnit ɣef iḍaṛṛen-is, mačči ɣef iferrawen-is, deg iseggasen n 80 nqeddec ɣef tmaziɣt amdan s amdan, s tɣawsa deg ufus ar ufus, amedya tisɣunin d iɣmisen i d-itteffɣen imir-nni sɣur kra n imussnawen d ikabaren. Ihi nelemed tutlayt n tmaziɣt, neɣɣar, nsell, armi nejmel. Deg useggas n 90 yufa-yi-d wakud ssnaɣ kra, ɣas akken ur jmileɣ ara. Ar deqqal yennulfa-d umaynut s tidett-is di temdint n Tizi-Wezzu, wagi d Agraw Adelsan Amaziɣ, nudaɣ armi ttekkiɣ ɣur-s, ufiɣ deg-s Arraz n Lmulud At Mεemmeṛ, kkreɣ uriɣ idlisen, serseɣ amenzu, rran-iyi-t-id, serseɣ abrid wiss-sin ungal ABRID N TAFAT, wagi yewwi-d arraz amenzu n Lmulud At Mεemmer, rniɣ wis sin d ammud n tullizin AMUSSNAW, yewwi-d arraz n usebɣes, rniɣ wayeḍ UDEM AMETTAN N TADDART TAZELMAṬ, yewwi-d arraz n usebɣes, adlis n tmedyezt d win i d amezwaru. Agraw diɣen yerna-d Tannant n Iselmaden n tmaziɣt, rniɣ ttekkiɣ di tannant, wwiɣ-d agerdas-inu am nek am iselmaden. Tannant n iselmaden terna-yi-d aṭas n waffud d uswir, d iselmaden imeqqranen uɣur nelmed, d wid yettwassnen nezzeh ur yelli cwiṭ, ad uɣaleɣ ad wen-ten-id sunḍeɣ. Agraw diɣen yessεa tasɣunt IZEN AMAZIΓ, ttaruɣ-d deg-s am imeddukal i d-yettaru deg-s..., am wakken Agraw yettaga-d timliliyin(séminaire) ttekkiɣ deg-sen, slid win-a xedmen di Γerdaya.

I syen akkin, selmadeɣ di dukliwin, di tin n Yusef-U-Qasi, giɣ-d tannant di 94, selmadeɣ deg ulmus n Suq Lḥed di tɣiwant n Timizar, bdiɣ-tt kfiɣ-tt, wwin warrac igerdasen-nnsen. Teɣli-d tannant nniḍen i d-tega Tidukla n iselmaden n tmaziɣt s ufus n Usqamu Ufella n Timuzɣa, di temdint n Tizi-Wezzu, necden-iyi-d slemdeɣ din-a, giɣ-d tirni-w armi d taggara. Uɣaleɣ ar Buxalfa, slemdeɣ deg Wammas n Ussileɣ n Buxalfa, slemdeɣ din-a aseggas, ulac win iyi-yullen, gummaɣ ad kemmleɣ seg uguren, ar deqqal ḥebsaɣ. Deg useggas n 90 ar armi d 95 lliɣ ttaruɣ ɣer Uɣmis Tamurt, uriɣ-d azal n 300 n imagraden. Llan iɣmisen nniḍen ttaruɣ-d deg-sen, Aɣmis Yallas i d-issuffeɣ uɣmis LE SOIR, d nek  i d aɣella n usebter n tmaziɣt deg-s, iitεawan-iyi Mass Lhacimi Tuzan. Uɣaleɣ ttagaɣ ula d isaragen akkd tdukliwin tidelsanin.

Ayagi giɣ-t d ttallelt d wazal i tutlayt-iw d tmagit-iw. Mazal u mazal aqlaɣ nettkemmil.