AWAL N TMUSSNI

Ccuka n umussnaw

Amar Tafat, Izarazen 

Tullist-agi teffeɣ-d di tesɣunt Izen Amaziɣ uṭṭun 06 deg useggas n 1996, sɣur Amar Tafat

Zikenni yella yiwen n urgaz qqaren-as Waεli afenṭazi; d isem-is i d naεt-is. Argaz-agi yella d ameṛkanti, ɣur-s iṣuṛdiyen d tferkiwin, ma d tamussni ixuṣṣ nezzeh.

Ihi teḍṛa yid-s yiwet n temεayt i t-iskecmen deg umezruy. Amek akka? Yella ɣur-s yiwen n uɣyul d ameqqran annect n userdun. Di teɣzi tehri ur yeǧǧ'ara, učči daɣen ur yeǧǧ'ara, maca di tikli d ameṛḍiḍ. Yal tikelt ad t-yerkeb,yettagwi ad yeddu! Ticki ara isewweq yiss, yezga d aneggaru ger imsewqen. Igad ifehmen tamsalt ẓṛan uyessin ad inheṛ aɣyul. Ihi,ticki t-id-segwran ar deffir, ad yeqqar:

— Ix! Ix! ssuq ad nseweq akw…

Maca deg ul-is tekker tmes. Tuɣal- as taluft-agi d aɣbel ur t-nesgan uḍan, tifrat ur tt-yufi. Yenna ad yessenz aɣyul, aɣyul taεǧeb-as talɣa-s, yegwra-d lεib-is a d-yefk Ṛebbi ttawil.

Yiwen wasyeqqim di tejmaεt, iger-d awal ɣef uɣyul-is, iqqaṛ-asen, ira ad t-yessenz. Inṭeq-d yiwen deg wat n udrum-is, yefka-yas-d tikti, yenna-yas:

— Uqbel ad tɣiwleḍ ar usenzi, awi send aɣyul-is ar Aεli n Temɣart, netta teẓṛiḍ yessen i temsal-agi n yiɣyal, ahat ad t-id-yejbeṛ.

Aεli n Temɣart d yiwen n umussnaw deg yiwet n taddart i d-yusan agemmaḍ-nnsen: d aεewwaj n umeslay, iferru tilla, yettdawi lmal yuḍnen. Di lεeṛc-is yettwassen nezzeh, tteḥwiǧint medden. Γef waya i das-semman medden amussnaw.

Waεli yuɣ awal n at tejmaεt. Am ass-a nnan-as-d, azekka-nni akken kan i d-yekker yerra ɣer Aεli n Temɣart. Yewweḍ ɣer taddart-is, isteqsa fell-as, dɣa yeffeɣ-d ɣur-s:

— Γas lxiṛ a leflani?

— D lxiṛ,d aɣyul-agi i bɣiɣ ad t-id-teẓṛeḍ

— D acu yuɣen aɣyul?

— Ur ẓṛiɣ ara, ala tettwaliḍ deg-s, ma yella d tikli a d-yawi Ṛebbi!

Yezzi-yas umussnaw i weɣyul, iwala-t ur yelli kra i t-ixuṣṣun, ifka-yas tabḍant n tuga, iskemkem-itt d umatu. Yuɣal yezzi ɣer bab n weɣyul, yenna-yas:

— Aɣyul deg udem-is yelha, yeǧhed itett, ur yelli deg-s lεib ameqqran, d aḥeqqaṛ kan i d aḥeqqaṛ.

Yenna-yas:

— D acu i d tawwurt-is, ih? 

Yenna-yas umussnaw:

— Yella ɣur-k ujenwi?

— Atan ujenwi, yezga ɣur-i nekkini!

— Ernu-yi-d asɣar.

Yerna-yas asɣar n uzemmur. Injeṛ-d umussnaw anebbac, yuli ɣef uɣyul, yenna-yas i bab-is "eṛǧu, tura a d-uɣaleɣ!".

Amussnaw inbec aɣyul, win-a yebda tiseyyert d uṛabaε. Yessɣaṛ-it-id, yuɣal-d ɣer umkan. Yers-d umussnaw ɣef uɣyul, yerkeb bab-is s unebbac deg ufus, yenna-yas umussnaw:

— Eddu tura, ad yeg Ṛebbi ad trebḥeḍ!

Argaz yenbec aɣyul, yedda s uɣiri ɣer wexxam-is. Deg wass-n d asawen, d netta i yettawḍen d amezwaru ɣer ssuq. Maca tafenṭazit-is tezger tillas. Yuɣal am win-a ur nettakel ara ɣef wakal. Yebda zzux d tnefcic, ittelli deg uqemmuc-is irennu; am win ara k-yinin d nekk i d-iḥellan. Irna iḥeqqeṛ medden deg ubrid. Maca slan akk s wayen yeḍṛan yid-s, yeffeɣ wawal fell-as di lεeṛc: ur yessin ara ad inheṛ aɣyul almi i d-icaweṛ fell-as!

Eṭṭfen-as-tt: mti ara d-yezri sdat yiwen, ad as-yini:

— Lemmer mačči d ccuka n umussnaw!