Yiwwas rziɣ ar yiwet n taddart, akkin i tɣiwant-nneɣ, nekk yili ttnadiɣ ɣef yiwen akken ad t-ttreɣ ɣef kra n temsal yerzan idles d tutlayt. Ihi mi udfeɣ ar taddart-is, ufiɣ yiwen urgaz ameqqran ɣef ubrid-iw, seqsaɣ-t ɣef umɣar-nni, nniɣ-as "amenddeṛ dda leflani ma ad yestaf?". Yerra-yi-d yenna-yi-d "win-a d amɣar uxemmuǧ, tura kan i yekker sya ahh". Nniɣ-as "dɣa d kečč ara ttreɣ d amezwaru. Acu i d amɣar uxemmuǧ?". Yerra-yi-d, yenna-yi-d "amɣar uxemmuǧ d win yezgan di taddart, melmi i d-tusid ad t-id-tafeḍ deg umkan-a".

Ladɣa s tidett, d ayen walant wallen-iw zik-nni, aɣyul ixeṛfen akken d imi ar iwali aɣyul-niḍen ikes, ad yazzel ɣur-s s ujεu, mi yewweḍ ɣur-s, ad t-yeεnu ar umseččew, ad t-yeṛẓ akk ma yerna-t! Akka i d tawaɣit di tudert n yiɣyal.
Qqaren diɣen "aḥemmel n uɣyul d tikerrac". Mačči yiwet!!

Neqqar deg inzi "ala abudu i yettimɣuren". Abudu/décharge. Zik yal taddart tessεa abudu/agudu. Imussnawen n zik senfaliyen tutlayt ɣas di timawit, semtitilen di tɣawsiwin ɣer wayen iḍeṛṛun, d wayen ttwalin. Inzan d tenfaliyin, yiss-n i d-ttuεerken akken iwata, am tɣawsiwin yemsel uḥiṭus, neɣ tid yenǧeṛ uneǧaṛ.        

Mačči sɣur yiwen kan ara nelmed, deg wakud-a anda tegwet tmussni d tussna, iwata ad nili s wagad d tagad yeɣɣaren, yettnadin am tzizwa, yal azeǧig a d-negmer deg-s kra. Am wakken qqaren "ur teẓṛiḍ anda tezdeɣ tmussni", neɣ "ur teẓṛiḍ taɣṛast yeεmeṛ Wuzmir", neɣ "yal azeǧig s riḥa-s". Aṭas n imussnawen d tmussnawin i yellan, ar a d-yettilin. Ad d-irnu Wuzmir rezgg i tmaziɣt.